У мінулым годзе Таццяна Мікалаеўна адзначыла юбілей працоўнай дзейнасці. Дваццаь пяць гадоў таму назад яна, маючы дыплом майстра – агароднінавода Вілейскага прафесійнага вучылішча, прыйшла працаваць у гаспдарку, якая зараз носіць назву ПСУП “Азярыцкі – Агра”. Чвэрць стагоддзя Таццяна Мікалаеўна адпрацавала на адным месцы, вырошваючы цяплічныя агуркі і памідоры.

Толькі на першы погляд праца агароднінавода здаецца простай. На справе ж, у гэтай прафесіі мноства сакрэтаў. Усімі тонкасцямі майстэрства авалодала Т.М.Таболіч, аб чым сведчыць тое, што з году ў год яна займае высокія месцы ва ўнутрыгаспадарчым спаборніцтве. Вось і сёлета яе партрэт размешчаны на Дошцы гонару ПСУП “Азярыцкі – Агра”.

Кожны год на замацаванай плошчы клапатлівыя рукі агароднінавода – прафесіянала ў студзені высаджваюць агуркі. У канцы лютага першыя агурочкі адпраўляюцца на паліцы магазінаў і радуюць спажыўцоў дзесьці да сярэдзіны ліпеня. Другім абаротам, у канцы ліпеня, высаджваюцца таматы, якія пладаносяць да канца лістапада. Можна толькі прыблізна падлічыць многія і многія тоны карыснай прадукцыі, што знайшла спажыўцоў дзякуючы старанням Т.М.Таболіч.

Работай у ПСУП “Азярыцкі – Агра” жанчына задаволена. Дастойны заробак дапаўняецца важкім сацыяльным пакетам, пазітыўнай атмасферай у працоўным калектыве. Да таго ж, пяць гадоў таму назад сям’я Таццяны Мікалаеўны атрымала службовае жыллё — двухпакаёвую кватэру.

Намеснік дырэктара ПСУП “Азярыцкі – Агра” па ідэалагічнай рабоце Юлія Барысаўна Ігнатовіч высока ацэньвае як прфесійныя, так і чалавечыя якасці Т.М.Таболіч. Па яе словах, Таццяна Мікалаеўна — старанная, працавітая, служыць узорам для сваіх калег.

Няхай жа, як і на працоўным месцы, у душы ў Таццяны Мікалаеўны будзе круглы год лета.

Уладзімір МІХАЙЛОЎСКІ.

На здымку: Т.М.Таболіч.

Фота Аляксандра ВАЛАДЗЬКО.

Информацию читайте в номере 87 –88 от 17.04.2013 г.