21 красавіка Прылепскі краязнаўчы музей сустракаў гасцей: яго наведалі дырэктары музеяў са Славакіі і Чэхіі. Справа ў тым, што ў 2012 годзе адбудзецца міжнародная канферэнцыя, прысвечаная вёскам, якія былі спалены ў часы Вялікай Айчыннай вайны. Замежныя госці, якія таксама прымуць удзел у гэтай канферэнцыі, даведаліся, што ў Прылепскім сельсавеце былі такія вёскі, і прыехалі ўвачавідкі прасачыць іх гісторыю.
21 красавіка Прылепскі краязнаўчы музей сустракаў гасцей: яго наведалі дырэктары музеяў са Славакіі і Чэхіі. Справа ў тым, што ў 2012 годзе адбудзецца міжнародная канферэнцыя, прысвечаная вёскам, якія былі спалены ў часы Вялікай Айчыннай вайны. Замежныя госці, якія таксама прымуць удзел у гэтай канферэнцыі, даведаліся, што ў Прылепскім сельсавеце былі такія вёскі, і прыехалі ўвачавідкі прасачыць іх гісторыю.
Кіраўнік Прылепскага музея Валянціна Васільеўна Лянцэвіч расказала калегам аб гісторыі музея. Пра экспазіцыю больш падрабязна распавялі вучні Прылепскага ВПК д/с – САШ. Найбольшую ўвагу юныя экскурсаводы засяродзілі на стэндзе, прысвечанаму партызанскаму руху, які на тэрыторыі Прылепскага сельсавета разгарнуўся з першых дзён вайны. Сярод апантаных партызан былі Генадзь Аляксандравіч Мрочак і Грыгорый Андрэевіч Казлоўскі. Дарэчы, менавіта гэтым людзям, якія пазней у складзе Чырвонай Арміі дайшлі да Берліна, удалося пераканаць пяць славацкіх ваяроў перайсці на бок партызан. Лісты пад назвай “Браты славяне!” партызаны хавалі ў макеце кавалка масла, а затым выменьвалі на цыгарэты. Дзякуючы гэтым лістам, пяць славакаў разам з усёй сваёй зброяй перайшлі на бок партызан, а двое з іх пазней былі ўдзельнікамі спецатраду “Артур”, які дзейнічаў на тэрыторыі Барысаўскага, Лагойскага і Смалявіцкага раёнаў.
Адзін са славацкіх гасцей Ёзэф Гібала нават падзяліўся думкамі аб тым, што адзін са славакаў Уладзімір Фекстэ, чые фотаздымкі ёсць у экспазіцыі Прылепскага музея, магчыма, быў яго стрыечным братам. Таксама госці падзяліліся добрымі ўражаннямі ад убачанага ў музеі. Прыемна здзівіла іх тое, што школьнікі добра ведаюць экспазіцыю і гісторыю сваёй малой радзімы.
Валянціна Васільеўна падаравала дырэктару музея Славацкага народнага паўстання Станіславу Мічаву кнігу “Нашчадкам прысвячаецца”, пра падзеі Вялікай Айчынай вайны і лёсы яе ўдзельнікаў, якія змагаліся на смалявіцкай зямлі.
Напрыканцы кароткай сустрэчы госці ўсклалі кветкі да помніка “Журботная маці”, каб аддаць даніну павагі ўсім, хто загінуў у засценках фашызму, і нагадаць: дым ад спаленых вёсак і па сёння не дае забыцца пра іх страшны лёс.
Вікторыя ЖЫЛЯКОВА.
На здымку: замежныя госці разам з юнымі экскурсаводамі.
Фота аўтара.
Информацию читайте в номере 103 – 104 от 11.05.2011 г.
