День: 06.03.2018

Споўнілася  роўна год, як з жыцця пайшла таленавіты педагог, сябра вучняў і калег, нераўнадушная жанчына, былая выкладчыца геаграфіі Прылепскай сярэдняй школы Дар’я Цімафееўна Абмётка. Нашчадкам яна пакінула добрыя справы, незабыўныя сустрэчы і значныя вынікі сваёй працы ў Прылепскім краі, дзе яна жыла з маладосці. Яшчэ ў далёкім 1965, на другім годзе маёй працы, загадчык школьнага аддзела Смалявіцкага РК ЛКСМБ у раённай газеце пісаў: “Ажывілася і прыняла новы змест работа з піянерамі і школьнікамі ў нашым раёне. Разнастайны і цікавы змест набыло піянерскае жыццё ў Прылепскай сярэдняй школе. Калі ў школе заходзіць гутарка пра справы піянерыі, абавязкова расказваюць пра выкладчыцу геаграфіі Дар’ю Цімафееўну Абмётка. Гэта яна, не лічачыся з асабістым часам, узначаліла разам са старшай піянерважатай Любоўю Булыга ўсю краязнаўчую работу, вадзіла школьнікаў у шматлікія паходы па месцах баявой славы… Пад кіраўніцтвам настаўнікаў і важатай піянеры ствараюць летапіс школы, летапіс камсамола свайго сельсавета… Аб гэтым гаварылася на раённым семінары піянерважатых школ, які адбыўся ў Прылепскай сярэдняй школе.” Так пачалася ў 60-я гады мая сумесная праца з Дар’яй Цімафееўнай у пошукавым напрамку. Дагэтуль настаўніца займалася краязнаўчай работай геаграфічнага напрамку. І першы турысцкі паход яна ажыццявіла да ракі Усяжа, калі я яшчэ вучылася ў старэйшых класах школы. Тады, ў 1959 годзе, у школе быў створаны краязнаўчы куток, куток П.Купрыянава, а пасля – куток баявой славы, які ўвесь час папаўняўся. Безумоўна, калектыў педагогаў нам дапамагаў, але ўся асноўная праца лягла на нашы плечы....