Як вядома, з 7 па 19 студзеня на Беларусі па добрым старажытным звычаі адзначаецца галоўнае свята зімовага цыкла — Каляда.
І ў адзін з гэтых дзён, якраз напярэдадні старога Новага году, у цэнтры Смалявічаў з’явілася вясёлая і галасістая калядная кампанія з гармонікам, каляднай зоркай, з Казой, Мядзведзем, Цыганом на шпаркім “кані”, стракатым натоўпам Цыганачак і іншымі каляднымі персанажамі. Ад дому да дому, ад арганізацыі да арганізацыі з песнямі ды музыкай прайшліся калядоўшчыкі, вітаючы смалевічан са святамі, дорачы ім цудоўны настрой, выказваючы шчырыя пажаданні, каб “і жыта радзіла, і мелі торбу грошай, і жылі ў раскошы”. Некалькі хвілінак гумару і смеху – і, здавалася, рабіўся святлейшым змрочны зімовы дзень, і неяк асабліва хораша станавілася на душы.
А нагадалі аб цудоўнай народнай традыцыі і парадавалі жыхароў горада супрацоўнікі гарадскога Дома культуры. Словы падзякі гучалі ім у адказ.
Кар. “КС”.
На здымках: выступленне каляднага гурта Смалявіцкага ГДК.
Фота Марыны МІХАЙЛОЎСКАЙ.
